اسكريبت النصف الآخر كامل حصرياً
في عضمي!!
فهد كان مبسوط جدا وفرحان وهايص كان بيتكلم كتير وبيضحك بكل حرية من غير قيود!
كان كده قبل ما نجهز السفرة ولما إتحط الغدا قعدنا إحنا الستات لكن فهد سابنا وخرج وكان بيقول بإبتسامة خلوا بالكوا من خطيبتي خلوها تاكل كويس
فهدي إنت رايح فين ما تسيبنيش لوحدي الله يخليك!
فهد بصلي بصة طويلة وإبتسم إبتسامة حلوة ومشي!
إنتوا عارفين والله ما عرفت آكل يادوب كده لمست الأطباق اللي قدامي!
كل شوية واحدة فيهم تقولي كلي مش شايفينك بتاكلي لا يكون الأكل مش عاجبك
أنا والله مش عارفة أرد وأقول إيه من شدة إرتباكي ماشي يا فهد إن ما وريتك!
التورتة عجبتهم كلهم او هما قالولي كده التورتة اللي أنا عملتها أقصد اللي أمي عملتها بس ده سر بيني وبينكم هس خليهم يمدحوا فيا شوية!
بعد كده فهد جه وقعد جنبي على طول ولزق راسه براسي وبصوت واطي سألني ها طمنيني كلتي كويس!
إبعد عني الله يخليك مش كده قدام الناس بتكسف!
هزيت راسي وأنا مكسوفة!
قالت واحدة منهم عروستك أكلتها ضعيفة يا فهد دي أكلها زي العصفورة ولا يكون مش عاجبها أكلنا!!
قلت لأ بالعكس
فهد رد وقطع كلامي عارفها هي أكلتها ضعيفة كده مش شايفين رفيعة إزاي!
واحدة تانية قالت أيوة رفيعة خد بالك منها كويس يا فهد
فهد بصلي وكان مبتسم وقال عندي أنا الموضوع ده!
قالت أخته إنت دوقت تورتة عروستك!
قال أيوة طبعا دوقتها وخلصتها قبل أي حد!
رجع بصلي وقال من إيدين الحبايب
والله! ما شاء الله عليك لا تكون بتحب أمي وأنا معرفش إسكت يا فهد بلاش إستعراض!
رجعت أخته تقول دي حلوة أوي أنا عايزة طريقتها يا ندى
أوووه طب ليه الإحراج ده بقى!!
ما لقتش مخرج من الموضوع ده غير إني قلت الوصفة مكتوبة عندي في كتاب الطبخ هكتبهالك وأبعتها مع فهد!!
عدت كمان ساعة وأنا قاعدة تحت المراقبة من فهد وعيلته!!
كل الوجودين كانوا بيتعاملوا معايا بلطف وذوق وفهد طول الوقت كان بيضحك وخد الرقم القياسي في الضحك الليلة دي!!
هو ما عندوش مشكله قاعد في بيته وفي وسط أهله ومع خطيبته حقك تبقى مبسوط يا فهد!!
بس والله لأحطك في نفس الموقف وأعزمك على الغدا في بيتنا ويكون أبويا موجود وإخواتي وعمي وولاده وخوالي وولادهم والجيران وولادهم كلهم هيبقوا موجودين!!
بعد ما مشينا إتفسحنا شوية بالعربية!
كان فهد لسه مبسوط جدا أما أنا فا آخيرا حسيت بالراحة!
الحمد لله عدت على خير!
فهد سألني إنتي كلتي كويس
كان فهد بيسألني وهو قلقان بجد عليا!
بصراحة لأ
طب ليه
كنت حاسة إني محرجة أوي يا فهد دي أول مرة أتعزم عندكوا!
هتتعودي على الموضوع يا حبيبتي أنا هاجيبك عشان تتغدي معانا مرة كل إسبوع
ياربي طب انا أعمل إيه في الراجل ده لسه قايل عليا إني رفيعة إنت عايز تخليني أختفي بقى!!
مارضيتش أتكلم وأقول حاجة عشان خطيبي ما يزعلش ويتحرج!!
قلت إن شاء الله على حسب الظروف
قال قعدنا مع بعض وقت حلو أوي وضحكت كإني ما ضحكتش قبل كده!
آه فعلا والله أنا من يوم ما خطبني ما شفتوش بيضحك بالشكل ده
لدرجة إني قلت عليه راجل تقيل وعاقل!!
أيوة عيلتك كمان كانوا لطاف جدا
هتتعودي عليهم كلهم بسرعة هما قلبهم طيب أوي زيي
لا يا شيخ أه منك بس أه!
عند غروب الشمس كنت واقفة على باب بيتنا وبودع خطيبي الضحوك وبتمناله ليلة سعيدة!
دخلت البيت ولقيت أخويا هشام بيجهز وخارج!
على فين يا هشام
ندى هو إنتي كنتي فين
حلوة دي يعني إيه كنتي فين ما تبص على لبسي ومكياجي
بذمتك يعني هكون فين!
كنت مع فهد في بيته ومعزومة على الغدا
هشام بص لساعة إيده وإستغرب ووشه إتغير!
غدا لحد دلوقتي وكنتوا بتاكلوا إيه جمل!
أيوة كنا بناكل جمل عندك مانع!
إبتسم هشام وقام عشان يخرج!
رايح فين يا هشام
رايح المسجد هو إنتي ما سمعتيش الأدان
أيوة
هو إنتي عايزة حاجة
أيوة بعد ما تخلص صلاة هتروح فين
ندى إختصري وقولي إنتي عايزة إيه!
حلو من غير ما تتعصب بس عايزاك تعدي على دومينوز بيتزا وتجيبلي واحدة عشان أنا ھموت من الجوع!
لازم يحصل شوية كسوف لما خطيبتك تاكل مع عيلتك أول مرة في بيتك ومع أهلك
أكيد أي بنت مخطوبة لو إتعزمت لأول مرة على الغدا في بيت أهل خطيبها هتكون مكسوفة ومرتبكة ومحرجة جدا لازم خطيبها يكون موجود عشان هي تبقى مرتاحة فى قعدتها وتبقى حاسة بالأمان
كمان
ياريت بقى وإنت مرجعها على بيتها تعدي على دومينوز بيتزا بالمرة
بعد ما علاقتنا بقت حلوة خالص بيني وبين عيلة فهد وإجباري بقيت أتغدى معاهم مرة كل أسبوع في بيتهم
خلاص إتعودت عليهم وما بقيتش أتحرج وأنا في وسطهم
بعد كل ده فهد كان حابب ياخدني أنا وعيلته ويسافر بينا بلد تانية عشان نتفسح فسحة طويلة ونرجع!!
البلد اللي جنبنا مش بعيدة شوية!
وافقي يا حبيبتي الكل عجبتهم الفكرة ومستنين موافقتك
فهدي إنت مش واخد بالك إنها وسعت أوي منك المرة دي إزاي عايزني أسافر معاكوا وإحنا لسة مخطوبين!!
مش عارفة أقولك إيه يا حبيبي بس ممكن أبويا يرفض الموضوع ده!
ابوكي ډخله إيه في الموضوع هو انا ولي أمرك ولا أبوكي!!
مراتي وعايزها تسافر معايا أنا وأمي وإخواتي البنات رايحين نغير جو شوية فيها حاجة دي!!
يلا بقى يا ندوش ما تحرجينيش قدام أهلي أنا قلت لهم إنك هتوافقي وهتبقي مبسوطة!
وليه مايرضاش أبوكي يا حبيبتي الطريق مش بعيد وما يعتبرش سفر ده حاجة بسيطة!! وبعدين حتى لو كان سفر إنتي مراتي يعني إيه اللي هيمنع!!
لا والله ما أنا عارفة إن أنا مراتك بس خليني أفكر شوية!!
كنت مش عارفة أقول إيه لماما فين لما قدرت أتشجع وأقولها!!
وسألتني أمي على طول مين هيروح معاكوا
كانت أمي بتكلمني وهي بتبصلي ومستغرباني!!
رديت بسرعة الكل رايحين أمه وإخواته البنات حتي إخواته المتجوزين هييجوا مع إجوازهم
والظاهر إن أمي إتطمنت لما عرفت كده بس مقالتليش روحي برضوا كانت مترددة شوية مش عارفة توافق ولا لأ!!
أبويا لما قلتله رد عليا وقال بجد والله!! خدوني معاكو
يا حلاوتك يا بابا والله إنت حبيبي أنا بقى سمعت الكلمتين دول وطيران على التليفون!!
فهد حبيبي إعملوا حسابي معاكوا
بجد يا حبيبتي الله دي هتكون رحلة ما حصلتش
بقولك يا فهدي أنا هيكون ليا مكان في العربية ولا مش هتكفي!!
ده كلام بالله عليكي ده إنتي لو مالكيش مكان هحطك في حضڼي
بعدين معاك شكلك عايزني أغير رأيي!!
هههه بحبك وإنتي متعصبة
لو سمحتوا باقي المكالمة ليا أنا وفهد بس!
تاني
يوم بعد صلاة الضهر كنت أنا واقفة على الباب مستنية فهد هييجي هو وعيلته ياخدوني بالعربية
أمي كانت واقفة في الشباك بتبص عليا!
حساها لسة قلقانة ومش متطمنة!!
رن تليفوني وكان فهدأهلا يا فهد
إزيك يا حبيبتي يلا تعالي مستنينك قدام الباب
تمام يا فهد إنت متأكد إن العربية فيها مكان ليا!
أيوة طبعا يا حبيبتي يلا تعالي
بصراحة كنت عايزة أعرف أم فهد قعدت فين!!
لما خرجت من البيت فرحت أوي العربية داخلة عليا والكرسي اللي جنب فهد فاضي!!
أيوة أنا عايزة أقعد جنب خطيبي هو حاجزلي الكرسي اللي جنبه واخدين بالكوا!!
وإتحركنا على بركة الله
المشوار كان طويل شوية بس ما حسناش بيه من كتر الضحك والهزار وأكل التسالي لب وحاجات مقرمشة!!
يا ترى هو إحنا شعب فعلالا نأكل حتى نجوع وإذا أكلنا لا نشبع!!
إنتوا ملاحظين أي حد يحب يخرج يتفسح أو يسافر تلاقيه أول حاجة تيجي على باله الأكل!!
الأكل ورانا ورانا منين ما نروح عارفين ليه عشان هو جزء كبير من حياتنا الإجتماعية والعائلية والأسرية!!
كان أول مكان وقفنا فيه بعد ما وصلنا هو المطعم!!
والله الكلام ما منوش فايدة!
فهد إختار لنا أرقى مطعم في البلد ودخلنا إتوزعنا كل مجموعة على ترابيزة!
بقيت أنا وفهد وإخواته البنات الإتنين معانا على الترابيزة!
كلنا كنا مبسوطين وفرحانين جدا وطلبنا أطباق كتيرة وإتبسطنا وإحنا بناكل أكل لذيذ ويفتح النفس جدا!!
فهد ما كانش مستني أول ما قلت بسم الله لقيته بيأكلني في بوقي!!
أنا إتكسفت أوي قدام إخواته حط قطعة جزر في بوقي
رغم كسوفي أنا كنت مبسوطة وأكلته قطعة خيار من نفس طبق السلطة!!
يلا خليه يتدلع شوية قدام إخواته ويتبسط!!
حتى إخواته كمان كانوا مبسوطين وهما شايفني بأكله في بوقه وبفرحه!!
عشان يتباهوا بالعروسة اللي إختاروها لأخوهم!!
فهد بعد الأكل دفع فاتورة كبيرة بس ما إهتمش وكان مبسوط!!
بعد ما خلصنا أكل روحنا الحمامات وبعد كده مشينا بالعربية
قعدنا نخطط جوا العربية هنروح فين بعد كده!!
خرجت من شنطتي إزازة البرفيوم بتاعتي ورشيت شوية منه في العربية
على فكرة فهد بيعشق ريحة البرفيوم بتاعتي أوي وكل ما يشوفه يقلي رشي لي شوية أنا ماليش دعوة وأنا أحطله شوية وبيكون مبسوط أوي!!
بعد ما رشيت رشة في إيدي قعدت أدعكهم في بعض وفجأة خدت بالي من المصېبة اللي أنا فيها!!
يا خبر إلحق يا فهد الدبلة مش موجودة في صباعي أنا شكلي نسيتها في حمام المطعم!!
قد إيه أنا كنت متضايقة من نفسي في الوقت ده!!
كنت عايزة العربية تتحول لطيارة عشان نوصل المطعم بسرعة قبل ما الدبلة تضيع!!
يارب إحفظهالي في مكانها يارب يا حبيبي!!
دي مش مجرد دبلة دهب في صباعي وخلاص دي قيمتها عندي أكبر من كده بكتير!!
بلاش تقلقي كده لو ضاعت تبقى فداكي يا حبيبتي
لأ يا فهد أنا مش عايزاها تضيع!
كانوا كل إخواته بيرددوا نفس الكلمة فداكي!!
آخيرا وصلنا للمطعم وأنا نزلت أجري زي الصاروخ ودخلت المطعم ولقيتها دبلة قلبي لقيتها!!
آه أحمدك يارب لقيتها دي لو كانت ضاعت ما كنتش هسامح نفسي أبدا!!
وبعدين فهد هيقول عليا إيه!!
إخواته كمان هيقولوا دي مهملة وبتضيع الحاجات المهمة من إيديها!!
مش عشان هي غالية وخلاص لأ عشان الدبلة ليها معنى نفسي كبير!!
لبست الدبلة فى صباعي بفرحة كبيرة وخرجت أشاور بيها لفهد وأنا مبسوطة ومرتاحة!!
فهد إبتسم وقال فداكي أي حاجة في الدنيا
فى رحلتنا الجميلة دي قضينا فترة من الوقت على البحر!!
البحر هنا ما يفرقش كتير عن البحر في بلدنا!!
كبير جدا وعميق أوي مع جمال الموج اللي كان بيلاعب رجلي!!
بصيت حواليا لقيتهم كلهم بعدوا وسابونا!!
بقيت أنا وفهد لوحدنا نشم ريحة البحر الجميلة!!
إزاي دماغي تنسى ذكريات الخروجة دي!!
خدي بالك من الدبلة بتاعتك بس ما تتعلقيش بيها أوي!!!
يا عالم إنتي ما تعرفيش الدبلة دي ممكن تفضل في صباعك قد إيه!!
سبحان الحي الذي لا ېموت!
إيه بقى الحاجة اللي بتحبها كل البنات والستات لكن الرجالة يكرهوها عما!
نزول السوق للشړا أو الشوبينج!!
أشجان خلينا ننزل النهاردة السوق عايزة أشتري شوية حاجات لزماني
أنا آسفة يا ندى بس أنا عندي مشاوير تانية النهاردة
ما ينفعش تأجلي مشاويرك دي لبعدين!
ضروري أنزل أشتري حاجات ما عنديش لبس للعيد وماليش غيرك
مش هقدر والله معلش يا حبيبتي ليه ما تقوليش لخطيبك ييجي هو معاكي!!
فهد
أيوة طبعا فهد هو إنتي ليكي غيره!
بس ده قالي قبل كده إنه ما بيحبش النزول والشړا خالص
ولا يهمك يا ندى ما بيحبش ده زمان لكن دلوقتي بقى متجوز وعنده زوجة دلوعة زيك بتحب تنزل كل شوية تتسوق ڠصب عنه لازم ييجي معاكي!!
انا عارفة إن التسوق آخر حاجة ممكن فهد يفكر يضيع وقته فيها!!
هو قبل كده عرفني إنه كان بيبقى متضايق جدا لما يضطر ينزل مع إخواته خصوصا في زحمة العيد!!
إنتي تفتكري إنه مش هيبقى متضايق!!
يتضايق!! حلو أوي والله بس ياندى بلاش عبط
يا حبيبتي لو ما شيلتيهوش المسئولية من دلوقتي ولو ما غصبتيهوش على اللي إنتي عايزاه هتيجي بعد الجواز تبقى عايزة تشتري حاجة كده ولا كده هيقولك أنا مش فاضي فاهمة!
متهيألي أشجان عندها حق في كل اللي قالته لازم أعود فهد يتحمل مشاويري وخروجاتي من دلوقتي!!
الكلام ده كان العصر وأنا قررت إن أنزل بعد ما بصيت على دولابي ومالقتش حاجة تنفع ألبسها في العيد!!
كل سنة وإنتوا طيبين حبيت أقولها لكوا دلوقتي عشان بعد كده هكون مشغولة أوي مع فهد!!
أنا مش عارفة جوزي كل ده مشغول بإيه عني ده آخر تليفون بينا كان الضهر!!
مسا الخير يا فهدي
مسا النور والحب يا حبيبة قلبي
إنت عامل إيه
أنا كويس جدا الحمد لله وإنتي
ممتازة مع مرتبة الشرف
غلبتيني
ماعاش ولا كان اللي يغلب حبيبي يا غالب الكل وفوق راسهم كمان
ما شاء الله عليكي إيه الكلام الحلو ده النهارده
أصبر على رزقك مفيش حاجة ببلاش كده!!
الحلو للحلو يا غالي
الله يحلي أيامك يا روح قلبي
معاك يا حبيبي يا رب
كل دي كانت مقدمات للي جاي ربنا يستر!!
فهد يا حياتي هو إنت بتعمل إيه دلوقتي!!
أبدا ولا حاجة اللاب توب بتاعي باظ وقاعد بحاول أصلحه
يعني مش فاضي
لأ أبدا يا حبيبتي إنتي عايزة حاجة!!
ربنا يخليك ليا
إحلمي يا ندى وأحلامك أوامر حبيبتي
تسلم لي يا غالي وأغلى حد في حياتي ربنا ما يحرمنيش منك أبدا
الله أكبر كل ده عشاني مرة واحدة
واضح أوي إن الموضوع كبير يا
دي عمرها ما قالتلي كلمتين حلوين زي ما أنا عايز!!
أمرك حبيبتي عايزة إيه
كنت بشوف إذا كنت تقدر تيجي معايا لو ماكنتش مشغول يا حبيبي
هنروح على فين
هنروح السوق
أيوة أنا قلت إن ورا كل الكلام الحلو ده حاجة كبيرة!!
والله أنا مسكين يعني البنات ما يطلعش من بوقهم كلمة حلوة من غير مقابل!!
إيه اللي جرى للراجل يادوب عرف وسكت خالص إوعى تكسفني يا فهد!!
أنا عارفة إنه ما بيحبش اللف في الأسواق الله يسامحك يا أشجان سخنتيني عليه!!
حابة تروحي أنهي مكان
مركز التسوق الكبير
حتى لو مشغول هروح معاكي وأمري لله
هتزعلى مني لو ما روحتش وتعمليلي مقاطعة وتخاصميني وتعملي حركات البنات اللي تطفش بلد!!
لأ أنا مش مشغول حبيبتي عايزة تروحي إمتى!
دلوقتي
تمام مسافة السكة وأبقى على باب البيت يلا إجهزي يا ندى
شكرا يا قلبي ربنا ميحرمنيش منك أبدا
المهم إن أنا ما أتحرمش من الكلام الحلو اللي سمعته من شوية وبيطلع من لسانك اللي بينقط عسل والله ندى على طول مخلياني في حرمان عاطفي وكان نفسي أسمع منها كلام حلو من زمان ياريتني كنت عارف موضوع السوق ده اللي خلا العقدة تتفك كان زماني وديتها من بدري!!
أمرك يا حبيبتي
خلصت المكالمة وبسرعة دخلت أوضتي عشان أجهز للمشوار!
مسكين يا فهد بس مش هو جوزي وانا مسئولة منه!!
طيب يبقى يوديني المكان اللي أنا عايزاه من غير إعتراض!
فهد سألني وانا قاعدة جنبه في العربية قوليلي عايزة تجيبي إيه!
طقم للعيد وشنطة وجزمة وشوية حاجات تانية
خير كده الموضوع فيه لف للصبح!
تمام إحنا هنروح السوق الكبير
دخلت السوق مع فهد ودخلت محل أتفرج على الحاجة اللي فيه وأسأل فهد إيه رأيك
حلو اوي هو عاجبك خلاص إختارتي ده
يا جماعة والله الراجل شكله مستعجل وعايز يخلص عايزني أجيب أي حاجة والسلام!
الصراحة كمان أنا مش واخدة راحتي أنا بحب أشوف هنا وهنا وأختار على مهلي!!
وبعدين ليه مش بيقول رأيه كل ما أسأله على حاجة يقولي حلوة!!
طب إنت مش شايف حاجة أحلى!!
لأ دي مش من إهتماماته!!
ما أظنش إن الرجالة يعرفوا يتسوقوا!!
بالرغم إن هو لف معايا في المحلات كلها اللي أنا شوفتها وشاف كل الحاجات اللي أنا شوفتها لكن برضوا معرفش يقول رأيه في أي حاجة ولا حتى يفاصل في حاجة عجباني!
الظاهر إنه مش متعود يفاصل مع البياعين أو مش عايزني أحس إنه مستغلي الفلوس!
طلع فهدي حبيبي كريم جدا ودفع تمن كل حاجة إختارتها وعشان كده انا بقيت مكسوفة منه أوي وقلت خلاص كده إشتريت اللي أنا عايزاه يلا نروح!!
فعلا مش عايزة تجيبي حاجة تانية!!
لأ يا حبيبي أنا جيبت حاجات كتير ومش عايزة حاجة تاني
طب والشنطة إنتي مش هتجيبي شنطة!!
أبقى أجيبها بعدين عشان أنا خلاص تعبت!!
طبعا انا لا تعبت ولا حاجة واللي يسيبني دلوقتي هفضل ألف في السوق للصبح!! لكن حرام فهد متضايق وباين عليه ومينفعش أضغط عليه أكتر من كده!!
إنتي لسة حاسة بالتعب دلوقتي أموت وأعرف إيه اللي بيخلي البنات تلف كده على كل المحلات ما اللي يعجبك إشتريه وخلاص!!
لازم يدوروا في كل المحلات الأول طب هو إحنا الرجالة فاضين للكلام ده!!
ماشي يا حبيبتي يلا بينا
قبل خروجنا من المكان عدينا على محل آيس كريم!
إيه رأيك ناكل آيس كريم يا حبيبي!!
ده بجد الدنيا برد وهتاكلي آيس كريم!!
أيوة نفسي آكل آيس كريم
أمرك يا ستي
أيوة هو إنتي خسرانة حاجة قاعدة تتدلع عليا وعارفة كويس إني هعملها اللي هي عايزاه!!
أصحابي قالولي هنشوفك وهي مجنناك بطلباتها وإنت بتعمل اللي هي عايزاه وإنت مبتسم كمان!!
طب وماله تعمل اللي هي عايزاه كل التعب يهون عشان خاطر عيون القمر!!
روحت على البيت وفهد مشي وكلمت أشجان في التليفون عشان تيجي معايا بكرة السوق!!
أيوة أنا كنت عايزة أشتري فستان حلو عشان أستقبل فهد بيه في العيد!!
نزلنا إشترينا فستان على ذوق أشجان وكان تحفة وروحنا!!
تاني يوم روحت الكوافير وكان زحمة جدا عشان العيد بكرا!!
قعدت ساعات طويلة لحد ما جه دوري وفهد جه وصلني على البيت!!
كان نفسه يشوف شكلي ووشى!!
بس انا ما رضيتش وعرفته إنه جاي عندنا الليلة الساعة تمانية ومشي فهد!!
أنا بسرعة جهزت القعدة بتاعتنا بالورد والشموع وفواحة البخور وكنت جايبة هدية حلوة لفهد طلعتها وحطيتها على الترابيزة!
جه فهد ومكنش مصدق
عينيه لما شافني وكنت جميلة جدا وإديته كمان الهدية وعجبته أوي وقعد يتغزل فيا وفي جمالي عايزين تعرفوا كان بيقولي إيه
لأ طبعا مش هقولوكوا!!
كفاية عليكوا كده يلا تصبحوا على خير سيبونا أنا وفهد نكمل سهرتنا لوحدنا
تمت بحمد الله
