شقـة الحـضانة ج 1 حكـايات منـي الـسـيد

أيوه أنا... أنت مين بقى؟
قعد على الكرسي وشاورلي أقعد، وقال
أنا اسمي كريم... ساكن في العمارة اللي قصاد عمارتك... البلكونة في البلكونة يا فندم. وبصراحة كده، أنا بقالي ست شهور بشوف العجب في شقتك، ولما عرفت بالصدفة من بواب العمارة إنك سبت الشقة دي لولادك ومفتكر إنهم عايشين فيها، ضميري مسمحليش أسكت... خصوصاً بعد اللي حصل الأسبوع اللي فات.
قلبي سقط في رجلي، قولتله بلهفة
حصل إيه؟ اخلص يا أستاذ كريم وقولي في إيه!
كريم طلع من جيبه مظروف كبير وحطه على الطاولة، وقال
طبعاً أنت عارف إن طليقتك مأجراها مفروش... ده الجزء اللي أنت اكتشفته بنفسك. لكن اللي متعرفهوش، إنها مأجراها بعقد صوري لواحد من قرايبها، والراجل ده بدوره مأجر الشقة دي من الباطن لشركات مجهولة بتشغلها ك مكتب استقدام عاملات وتسكين مغتربين.. الشقة بيدخل ويخرج منها في اليوم الواحد مش أقل من عشرين تلاتين بني آدم... رجالة وستات من جنسيات مختلفة، وناس شكلها يريب. العمارة بقت شبه قندهار، والسكان هناك بدأوا يشتكوا ويعملوا محاضر بسبب الحركة الغريبة اللي بليل، وبسبب الخناقات اللي بتحصل جوه الشقة بين السماسرة والشغالين!
أنا تنحت... مكنتش قادر أستوعب الكلام. شقة حلم عمري... الرخام اللي نقيته، الحيطان اللي دهنتها، المكان اللي كنت متخيل ولادي بيلعبوا فيه وبيكبروا جواه... يتحول ل لوكاندة ومكتب مشبوه للعاملات والمغتربين؟!
قولتله بصوت مرتعش
طب وهي... هي بتعمل كل ده ليه؟ دي بتاخد نفقة ومصاريف ومبقتعش عنها جنيه!
كريم بصل بأسى وقاللي
الفلوس يا أستاذ أحمد... الطمع. الشقة دي في منطقة حيوية، وإيجارها مفروش بالطريقة دي بيدخلها مش أقل من خمسة وعشرين أو تلاتين ألف جنيه في الشهر، ده غير النسبة اللي بتاخدها من السمسار. هي سكنت مع والدتها، والولاد مرميين هناك، وسايبة الشقة دي للي يسوى واللي ميسواش يهد فيها... والأنقح من كده بقى، إن الشرطة بدأت تراقب المكان بسبب بلاغات الجيران، واليومين دول بيجهزوا حملة عشان يداهموا الشقة ويفحصوا أوراق الناس اللي قاعدة فيها... متخيل لو الشقة دي اتداهمت وهي لسه باسمك أو باسم ولادك وقيد الحضانة؟ دي هتبقى فضيحة العمر، واسمك هيتمرمط في المحاكم وجلسات الآداب والتشغيل غير المرخص!
المظروف اللي كريم سابه كان فيه صور... صور لناس طالعة ونازلة من باب شقتي، صور لستات قاعدين في البلكونة اللي كنت بقعد فيها أشرب شاي الصبح، وصور لنسخ من شكاوى الجيران المقدمة في القسم.
شكرت كريم وأنا مش شايف قدامي. قمت من القهوة والدموع محبوسة في عيني... مش دموع ضعف، دي دموع قهر وحسرة. ركبت عربيتي وسوقت بأقصى سرعة لبيت حماتي السابقة... البيت اللي ولادي قاعدين فيه دلوقتي.
وصلت هناك، طلعت السلم تلات درجات في خطوة واحدة، وفضلت أرزع على الباب بكل غل الدنيا. الباب اتفتح، ولقيت حماتي هي اللي واقفة. أول ما شافتني وشي متغير وعيني حمرا، خافت ورجعت لورا.
في إيه يا أحمد؟ بتخبط كده ليه؟ الولاد نايمين!
دخلت الشقة من غير ما استأذن وزعقت
فين بنتك؟ فين هالة؟ اندهيلي هالة حالا!
خرجت هالة من الأوضة وهي بتعدل هدومها، وبصتلي ببرود وقالت
إيه السبهللة دي؟ أنت إزاي تدخل كده وتزعق؟ نسيت إننا اطلقنا ولا إيه؟
قربت منها وأنا بطلع الصور من المظروف وبحدفهم في وشها... الصور اتبعثرت على الأرض بينها وبين أمها.
نسيت؟ أنا اللي نسيت ولا أنتِ اللي نسيتي دينك وضميرك وأمومتك؟! الشقة يا هالة؟ شقة الحضانة اللي المحكمة حكمتلك بيها عشان تربي ولادي فيها، مأجراها مفروش ومشغلاها مكتب وسمسرة؟ سايبة ولادك هنا ورايحة تتاجري بشقى عمري؟!
وش هالة جاب ألوان، وبدأت تترعش، بس حاولت تكابر وتعمل نفسها قوية
وأنت مالك؟ الشقة معايا بحكم محكمة، وأنا حرة أعمل فيها اللي أنا عايزاه! طالما الولاد بياكلوا ويشربوا وبلبسوا، يبقى ملكش دعوة أعيش فين ولا أعمل إيه!
أمها دخلت في النص وقالت بصوت عالي
جرى إيه يا سى أحمد؟ أنت جاي تعمل علينا راجل هنا؟ بنتي بتأمن مستقبل عيالها بالقرشين دول، الشقة واسعة عليهم وهما واخدين على القعدة معايا، إيه الجريمة في كده؟
ضحكت ضحكة مكتومة مليانة وجع وقلت
تأمن مستقبلهم؟ بأجهزة مشبوهة وقضايا في القسم؟ الجيران مقدمين بلاغات، والبوليس مراقب الشقة وهيداهمها في أي وقت! أنتِ مش بس ضيعتي حقي، أنتِ بتضيعي عيالنا وبتوسخي اسمهم! الشقة دي كانت للحضانة... وطالما مفيش حضانة في الشقة، يبقى ملوش لزوم تقعدي فيها ثانية واحدة.
هالة زعقت
المحكمة هي اللي حكمتلي، وأعلى ما في خيلك اركبه! مش هتعرف تاخد مني سنتيمتر واحد في الشقة دي، والقانون بيحمي الحاضنة!
بصيت لها بنظرة أخيرة، نظرة شخص مبقاش باقي على حاجة، وقولت بكل هدوء وثقة خلوها تتخض
القانون بيحمي الحاضنة اللي صاينة أولادها وقاعدة بيهم في بيت الحضانة... مش اللي قالبه البيت لوكاندة ومأجراه من الباطن ومقعدة الولاد عند جدتهم. اسمعي بقى يا هالة... من اللحظة دي، مفيش جنيه واحد هيتحول على حسابك. مصاريف المدارس والعلاج هدفعها بنفسي زي ما أنا، لكن الخمس تلاف جنيه بتوع الأكل والشرب واللبس المترمي على الفواتير... انسيهم. والشقة دي أنا هاخدها... هاخدها بالقانون وبعين حمرا مش هتعملي حسابها.
سبتهم وخرجت، ورزع الباب ورايا كان بيهز العمارة كلها.
تاني يوم الصبح، كنت واقف قدام مكتب الأستاذ