بين الحياة والموت ج 2 حكـايات مني السيد حصري

أول ما لقيتك كتبتي الورقة وضميري صحاني، عملت نسخة من التسجيل على فلاشة شخصية عشان أحمي نفسي من تحقيقات النيابة الإدارية لو عمار حب يلبسني مصيبة.
شاكر بيه خطف السماعة من إيدي أحسنت يا دكتور طارق، جهز نفسك الساعة 11 الصبح تكون قدام مكتب المحامي العام لنيابات الأموال العامة في التجمع، وشهادتك مع التسجيل ده هتكون سبب في إنك متدخلش كمتهم في قضية الإهمال والاشتراك في الشروع في القتل، بل هتكون الشاهد الملك.
الساعة 12 الظهر، كان المشهد في مستشفى الأمل التخصصي في قمة الفوضى.
عمار كان واقف في مكتبه، رابط الجرافاتة بعصبية وبيشرب سجاير ورا بعض، والمكتب مليان ورق متلخبط. جنبه نيفين، قاعدة على الكنبة الجلد حاطة رجل على رجل، لابسة بدلة حريمي كحلي شيك، وماسكة شنطتها الجوتشي اللي اشترتها من أسبوعين، وبتبصله بزهق ما خلاص بقى يا عمار! فلتت وخرجت، هتعمل إيه يعني؟ تروح لأهلها تقعد تعيط؟ أهو بالمرة نخلص منها وتبقى ورقة طلاقها بحق وحقيقي ونسيب الشقة وننقل عالفيلّا اللي في الشروق! أنتي غبية يا نيفين؟ غبية ومش فاهمة حاجة! فيروز مش بتاعة عياط ولا قعاد عند الأهل، دي كانت رئيسة قسم تدقيق مخاطر، أنتي متعرفيش دماغها! وبعدين خروجها من المستشفى بالمنظر ده معناه إنها عرفت إنك أنتي اللي كنتي معايا في العربية، وعرفت إني فضلتك عليها، دي لو راحت النقابة وفتحت محضر إهمال طبي هتشردنا! تشرد مين يا حبيبي؟ معاها إثبات؟ ده حادثة طريق، وأنا كان عندي كدمة خطيرة وأنت طبيب وبتقدر الأولويات، والورق اللي في جيبي يثبت إن شركة الأفق باسمي أنا، والشقة باسمي أنا، هتعملنا إيه يعني؟ تقلب قرد؟
وقبل ما عمار يرد، الباب اتفتح فجأة من غير خبط.
دخل اتنين ضباط برتبة عقيد ومقدم من مباحث الأموال العامة ومفتشين من وزارة الصحة وهيئة الرقابة الإدارية، ووراهم مدير أمن المستشفى بوش أصفر ومرعوب.
عمار اتخض ووقف مكانه، السيجارة وقعت من إيده على السجادة في إيه هنا؟ حضراتكم داخلين مكتب رئيس القسم كدة إزاي؟! العقيد طلع كارنيهه وورقة مدموغة بأمر ضبط وإحضار دكتور عمار مصطفى الشناوي؟ والمدام نيفين عبد الحميد السيد؟ نيفين قامت وقفت بخضة وصلابة مصطنعة نعم؟ خير يا فندم؟ إحنا هنا في مستشفى محترمة، أنتوا عايزين إيه؟ صادر ضدكم أمر ضبط وإحضار من نيابة الأموال العامة العليا، وإذن بتفتيش مكتب رئيس قسم الطوارئ، وتفتيش مقر شركة الأفق للتجهيزات الطبية، بتهمة غسيل أموال، واستيراد أجهزة ومستلزمات طبية مهربة ومسرطنة وغير مطابقة للمواصفات بدون تصريح من هيئة الدواء، وتزوير عقود بيع واستغلال توكيلات ملغاة.
نيفين فتحت بؤها بصدمة، ورجليها خانيتها وقعدت تاني على الكنبة تزوير إيه وتهريب إيه؟! أنا ماليش دعوة، عمار هو اللي ممشيني وهو اللي قايلي أمضي! عمار صرخ فيها بجنون اخرسي يا نيفين! اخرسي متقوليش حرف! وبص للظابط بعصبية مين اللي مقدم البلاغ الكيدي ده؟ مراتي مش كدة؟ فيروز؟ البنت دي اتجننت وعندها انهيار عصبي بسبب الحادثة وعايزة تنتقم مني عشان اتجوزت عليها!
صوت خطوات هادية ورزينة ظهرت ورا الباب. خطوات كانت بتدوس على البلاط بثقة مطلقة.
دخلت أنا. كنت لابسة بالطو أسود طويل، رافعة شعري لفوق، وشي هادي وثابت كأنه صخر، وجنبي شاكر بيه المحامي والدكتور طارق ماسك في إيده ملف الأشعة والتسجيل الصوتي.
عمار بصلي كأنه شايف عفريت قام من التربة. عينيه برقت بذهول مرعب فيروز؟! أنتي.. أنتي إزاي ماشية على رجلك؟! ماشية على رجلي عشان ربنا مأردش إني أموت على إيدك يا دكتور.. ربنا نجاني عشان أشوف بعيني نهايتك أنت وشريكتك المصونة.
نيفين اتنطرت من مكانها وقربت مني بحقد وصوت عالي أنتي فاكرة نفسك هتلوي دراعنا بالشو ده؟ الشقة شقتي ومكتوبة باسمي ومسجلة، والفلوس فلوسي والشركة شركتي، والتوكيل اللي مع عمار توكيل رسمي عام يخليه يبيع للهوا الطاير! بصيتلها بنظرة استحقار من فوق لتحت، مديت إيدي بالشنطة وطلعت صورة طبق الأصل من محضر الشهر العقاري التوكيل اتلغى يا شاطرة، وبلاغ النيابة مدعم بكشف حساب بنكي يثبت إن تمن الشقة محصلش فيه أي قبض ولا دفع، بيع صوري للتهرب من أموال الزوجية وخيانة الأمانة، والنيابة لسه حالا منزلة قرار بالتحفظ على كل أصول شركة الأفق، وتجميد حساباتك وحسابات عمار في كل بنوك مصر، بما فيها شقتنا اللي سرقتوها.
عمار حس إن الأرض بتميد بيه، وشه شحب تماما، العرق بدأ ينزل من جبينه على رقبته، وقرب مني بخطوتين وهو بيترجاني بصوت واطي ومكسور فيروز.. فيروز اهدي، خلينا نتكلم لوحدنا.. إحنا بينا عشرة، خمس سنين مش هيهونوا عليكي كدة؟ أنتي عارفة إني بحبك، جوازي من نيفين كان غلطة، نزوة عشان المركز يكبر، وأنا مستعد أطلقها دلوقتي حالا قدام الكل وأكتبلك الشقة والمركز وكل حاجة باسمك أنتي! بس متدمريش اسمي ومستقبلي!
بصيت في عينيه كويس أوي. مكانش بيحبني، ولا ندمان على وجعي، ولا فارق معاه إني كنت هموت قبل يومين.. عمار كان خايف على نفسه، خايف على اليافطة النحاس اللي بتلمع، خايف على الفلوس والبرستيج اللي بناه على كتافي وسرقه من شقايا.
ضحكت ضحكة خفيفة خلت دمه يتجمد خمس سنين؟ الخمس سنين دول ماتوا مع أول نقطة دم نزلت مني على الأسفلت وأنت بتبص عليا وبتجري تحضن