بين الحياة والموت ج 2 حكـايات مني السيد حصري

الجزء الثالث والأخير
الشمس كانت لسه بتبدأ تشق ضباب الصبح البارد فوق كباري مصر الجديدة، وصوت أذان الصبح كان بيدخل في مسام ودني بنوع من الطمأنينة الغريبة، طمأنينة الهدوء اللي بيسبق طوفان ملوش رجعة. التاكسي وقف قدام عمارة عتيقة من طراز عمارات روكسي القديمة، بيبانها خشب أرو عريض وأسانسيرها مشبك حديد مذهب.
نزلت وأنا ساندة بكل طاقتي على دراع الباب. الوجع في جنبي كان بيصرخ، والشاش اللي ملفوف على جرح بطني حسيته اتشد ورشح مية خفيفة، بس مكنش في وقت للدلع ولا للمستشفيات دلوقتي. دخلت المدخل وطلعت للدور التالت، عند يافطة نحاسية محفورة بوقار المستشار شاكر رضوان المحامي بالنقض ومستشار النزاعات المالية والمصرفية.
شاكر بيه مكنش مجرد محامي شاطر، ده كان أستاذي وصديق والدي الله يرحمه، والراجل اللي كان ماسك الشؤون القانونية للبنك الاستثماري اللي كنت شغالة فيه زمان. هو الوحيد اللي عارف قد إيه فيروز المهدي دماغها سم في الأرقام ومبتسيبش هفوة وراها.
رنيت الجرس، وبعد دقيقتين فتحلي راجل ستيني بشعر أبيض مهندم، لابس روب صوف فوق بيجامته، وبصلي بذهول وهو بيعدل نضارته الطبية فيروز؟! بنتي، خير يا رب؟ إيه المنظر ده، مالك واقعة على نفسك كده ليه؟! شاكر عمي.. معلش جيتلك في الفجر وبدون ميعاد، بس مفيش غيرك هيفهمني وهيجيبلي حقي من غير ما يتهز.
سندني ودخلني الصالون الواسع، نده على مراته طنط نادية اللي جريت جابتلي مية بسكر وشال صوف وغطتني بيه وهي بتضرب على صدرها من الخضة. طلبت منها متجبش إسعاف ولا تقلق، كل اللي محتاجاه مسكن قوي وكوباية شاي مظبوطة، عشان اللي عندي ميتأجلش ثانية واحدة.
طلعت اللاب توب بتاعي والملفات والفلاشة السودا وحطيتهم على الترابيزة الرخام.
قعد شاكر بيه على كرسيه، وركب نضارة القراية، وبدأ يقلب في الورق اللي طلعته من خزنة عمار، وكل ما يقلب صفحة، وشه يتغير وعينيه تبرق بحدة عقد بيع شقة التجمع لنيفين عبد الحميد بتوكيلك العام؟ أيوا.. ومسجل بتاريخ قبل الحادثة بأسبوعين، وبسعر صوري ميجيش ربع قيمتها الحقيقية. وشهادات إيداع شركة الأفق للتجهيزات الطبية.. 850 ألف جنيه مسحوبة من حسابكم المشترك؟ ولسه يا شاكر بيه، افتح الفلاشة دي وشوف الحسابات السرية اللي باسم نيفين في بنوك خارجية في قبرص ودبي. دي مش أرباح عادية، دي عمولات توريد أجهزة ليزر ومستلزمات جراحة تجميل غير مطابقة للمواصفات ومتهربة من جمارك بورسعيد والسويس بدون موافقة هيئة الدواء المصرية، عمار كان بيستخدم اسم نيفين كستار والشركة باسمها عشان يسقط مسؤوليته الطبية والجنائية لو حد اتأذى، وفي نفس الوقت مأمن نفسه بإيصالات أمانة على بياض ماضيها هو عليها من تحت لتحت وحاططها في الخزنة.
شاكر بيه بصلي برهبة وابتسم نص ابتسامة فيها إعجاب حقيقي يا بنت الإيه.. أنتي لسه زي ما أنتي، لما بتفتحي ملف بتشرحيه بمشرط جراح! الجراح الحقيقي حاول يقتلني الصبح يا سيادة المستشار.
حكيتله التفاصيل كلها، من أول ما عمار استخسر فيا الأشعة المقطعية وسابني أنزف على التروللي عشان يدخل ضرتي نيفين اللي مفيهاش خدش، لحد هروبي من المستشفى وورقة الطلاق اللي كتبتها للدكتور طارق.
شاكر بيه خبط بإيده على المكتب بقوة هزت فناجين الشاي ده ميبقاش دكتور، ده مجرم منعدم الضمير! واسمعيني كويس يا فيروز.. إحنا هنا قدامنا سكتين سكة المدني ومحاكم الأسرة والنفقة، ودي بتاخد سنين وسنين ونفحت في الصخر عشان تاخدي فتات.. وسكة الجنايات ومكافحة التهرب والجرائم الاقتصادية وغسيل الأموال، ودي اللي فيها كسر عضم وملهاش دية. أنا مش عايزة نفقة يا شاكر بيه، أنا عايزة حقي كامل، وعايزة كل مليم خده عمار يرجعلي، وعايزة اللي كان هيسيبني أموت يدفع تمن جريمته بالقانون.
شاكر عدل ضهره وقال بصرامة يبقى جهزي نفسك، النهاردة السبت، البنوك إجازة، بس الشهر العقاري والنيابة العامة شغالة. أول خطوة هنعملها الساعة تسعة الصبح بالدقيقة، إلغاء التوكيل العام رقم 4122 رسميًا، وإرسال إنذار على يد محضر للشهر العقاري بوقف أي تعامل على شقة التجمع ووضع إشارة قيد دعوى بطلان تصرف الوكيل لمصلحة الغير وبدون سداد الثمن. وتاني خطوة؟ تاني خطوة، طارق زميله اللي أنقذك.. الدكتور ده لازم يحمي ضهره ويحمي شهادته قبل ما عمار يبلعه.
فتحت تليفوني واتصلت بطارق. طارق رد من أول رنة وكان صوته قلقان جدا مدام فيروز؟! أنتي فين؟ دخلت الأوضة ملقيتكيش، المستشفى مقلوبة والدنيا قايمة! دكتور طارق.. أنا في مكان أمان مع المحامي بتاعي. عمار عرف حاجة؟ عرف من نص ساعة بس! جه يمر على الحالات كالعادة عشان يعمل شو قدام المدير، ولقى السرير فاضي، ولما سأل الممرضة وطلعتله الورقة اللي أنتي كتبتيها بإيدك.. اتجنن! وشه بقى زي الكركديه، كان هيتشنج في الممر، وجري على الإدارة يطلب يفرغ كاميرات المراقبة ويشوف مين اللي سمحلك تخرجي، ولسه بيزعق وبيقول دي مراتي وهرفع قضية إهمال على المستشفى كلها عشان خرجت مريضة بتموت من غير إذني. طارق.. اسمعني كويس، دكتور شاكر رضوان المحامي هيكلمك دلوقتي، محتاجين منك صورة رسمية من تذكرة الدخول، وتسجيل المكالمة اللي عمار أمرك فيها برفض دخولي الأشعة المقطعية، مش عمار كان بيسجل المكالمات دي على سيرفر الطوارئ؟ كل مكالمات أجهزة اللاسلكي وتليفونات التحويلة متسجلة أوتوماتيك على سيرفر المستشفى الطبي الداخلي، وأنا الصبح،