قـايمة جـوازي ج 1 حكـايات مني السيد حصري

لجوه وبتزعق فيها
يا خايبة.. بوظتي كل حاجة.. ضيعتي أبوكي وضيعتي نفسك!
حصري على صفحة روايات و اقتباسات
نزلت السلم وأنا مش حاسس برجلي.. الهوا برا البيت كان ساقع بس كان أرحم بكتير من خنقة الصالون اللي كنت فيه.. ركبنا العربية وأبويا ساق في صمت.. وأمي ورا عمالة تصبرني وتقولي
معلش يا ابني.. فداك ألف واحدة.. ربنا نجاك.. دي لو كانت دخلت بيتك كانت هتبقى عينهم على كل قرش معاك عشان يسدوا ديونهم.. الحمد لله إنها ظهرت على حقيقتها من الأول.
كنت ساكت.. مش قادر أتكلم.. كلام أمي منطقي، بس قلبي مش قادر يستوعب السرعة اللي انقضت بيها الأحلام.. البنت اللي كنت بختار معاها ألوان الستائر والسجاد من كام يوم، بقت دلوقتي برة حياتي.. أو المفروض تكون برة حياتي.
وصلنا البيت.. دخلت أوضتي.. رميت علبة الشوكولاتة على المكتب ونفسي لسه مخنوق.. قلعت القميص الجديد اللي كنت لابس ومبسوط بيه.. وقعدت على السرير وبصيت في السقف..
فجأة موبايلي رن.. بصيت على الشاشة.. كانت ليالي..
مردتش.. قفلت الصوت وسبته يرن.. ورن تاني.. وتالت..
وبعدها بدأت الرسايل تيجي ورا بعضها
طارق أرجوك رد عليا.. أنا بتموت هنا.. بابا وخالو مبهديلني.. بس أنا ميهمنيش كل ده.. أنا يمني إنت.. طارق أنا قولتلك الحقيقة عشان بحبك.. لو سمحت متضيعش حبنا عشان غلطة هما اللي عملوها.. خلينا نقعد لوحدنا ونتكلم ونشوف حل..
فضلت باصص للرسالة.. كلامها كان بيحرك حاجة جوايا.. الرفض والصدمة اللي كنت حاسس بيهم بدأوا يهدوا شوية، وبدأ التفكير العقلاني يشتغل.. ليالي مأذتنيش.. ليالي حمتني.. بس أهلها؟ هل هقدر أعيش مع عيلة بالمنظر ده؟ هل هقدر آمن لأبوها وخالها بعد كده؟
قمت وقفت في الأوضة، وبدأت أتحرك رايح جاي.. فكرة إني أسيبها صعبة، وفكرة إني أرجع وأوافق على المهزلة دي أصعب..
وفجأة.. لقيت رقم غريب بيتصل بيا.. رقم مكنتش شوفته قبل كده..
رديت بصوت ناشف
أيوة.. مين معايا؟
جالي صوت راجل كبير، بس مكنش صوت أبوها ولا خالها.. كان صوت غريب ونبرته جادة جداً
الأستاذ طارق معايا؟
أيوة أنا.. مين حضرتك؟
أنا الأستاذ مجدي.. المحامي المحكم في قضية الديون اللي على حماك.. وعرفنا باللي حصل في الجلسة عندكوا.. وعايز أقولك إن الموضوع أكبر بكتير من مجرد 620 ألف جنيه.. ولو إنت فاكر إنك نديت بجلدك بمجرد إنك مشيت.. تبقى غلطان يا ابني..
حسيت برعشة في ضهري.. وقلت بقلق
يعني إيه؟ أنا مالي بالموضوع ده أصلا؟ أنا سبت البيت ومشيت وممضيتش على حاجة!
المحامي ضحك ضحكة باردة وقالي
ما هو دي المشكلة.. حماك كان واخد شيكات على بياض من ناس، والناس دي عرفت إنه هيجوز بنته، ودلوقتي هما بيدوروا عليك إنت شخصياً عشان..
حكايات_مني_السيد
يتبع في الفصل الثالث...