سـمّ الحـما كـاملة بقلـم منـي الـسـيد

كل حاجة صح.. إحنا ماننفعش لبعض، لإنك عمرك ما هتاخد صفي، ولا عمرك هتحميني من لسانها!
هاني قام وقف وهو وشه محقن بالغل
عندك حق، كانت هي اللي صح.. إنتي فعلاً مابتفكريش غير في نفسك، والناس كلها عندك مالهاش لازمة!
كويس إننا اتفقنا في حاجة!.. داليا ابتسمت ببرود.. اتفضل بقى روح ل ماما طبطب عليها.
يعني بجد هتهدي تلات سنين في لحظة؟
أنا مابهدتش، أنا بنقذ اللي فاضل مني! ويلا اتفضل، والمفاتيح سيبها مكانها.. ولو إن كدة كدة هغير الكالون، مين عارف.. يمكن طنط معاها نسخة تانية احتياطي!
هاني بص لها بكرة، ورزع المفاتيح على الترابيزة وهو بيقول
اشبعي بيها!
مع السلامة يا هاني.. وقول لمامتك بلاش تيجي هنا تاني، عشان المرة الجاية مش هتكون ورد!
المواجهة الأخيرة في الكافيه
عدى شهر.. داليا كانت قاعدة في الكافيه بتاعها المفضل، وفجأة لقت طنط تهاني داخلة عليها بخطوات واثقة وقعدت من غير استئذان.
لازم نتكلم!.. قالتها تهاني بلهجة آمرة.
متهيألي مفيش كلام يتقال يا طنط.. كل شيء انتهى!.. داليا شربت القهوة ببرود.
انتهى إيه؟ إنتي عارفة ابني حالته بقت عاملة إزي؟ خَسّ النص وبقى شايل الهم، وكل ده بسببك!
ده ابنه وحياته، هو راجل كبير ومسؤول عن نفسه!
راجل كبير؟ تهاني وحركت إيدها بحسرة.. ده بقى وحيد، من غير زوجة، من غير...
من غير زوجة؟ داليا قطعت كلامها.. مش هو ده اللي كنتي عايزاه من أول يوم؟
أنا كنت عايزة له الأحسن!
لا، إنتي كنتي عايزة السيطرة.. عليه، وعليّا، وعلى البيت!
الويتر جه، داليا طلبت قهوة تانية، وتهاني رفضت تشرب حاجة وهي بتهز رجلها بعصبية.
اسمعيني يا بنتي.. تهاني وطت صوتها.. خلينا ننسى اللي فات ونبدأ صفحة جديدة!
ليه؟ عشان نرجع لنفس الدايرة؟
أنا اتغيرت! بجد.. الكام أسبوع اللي فاتوا علموني كتير.
داليا ضحكت بصوت عالي
إنتي؟ اتغيرتي؟ مش قادرة أصدق! دي نكتة الموسم!
فهمت إني زودتها شوية، وضغطت عليكي زيادة..
إنتي مكنتيش بتضغطي، إنتي كنتي بتهدي بيتنا طوبة طوبة.. ونجحتي فعلاً!
داليا قلبت السكر في قهوتها وهي بتبص لتهاني اللي كانت بتقطع المنديل في إيدها من التوتر.
هاني اتغير أوي.. كملت تهاني بكسرة.. حتى مابقاش يجي لي! وبيقولي إني أنا السبب في كل اللي حصل. متوفرة على روايات و اقتباسات
وهو كدب؟
يمكن.. تهاني وافقت بصعوبة.. بس أنا أم! وكان قصدي...
قصدي وقصدك! داليا قفلت الموضوع.. مشكلتك إنك مش شايفة ابنك راجل، شايفاه لسه طفل محتاج وصاية، وده اللي خلاه يهرب منك ومني!
تهاني طلعت منديل ومسحت عينيها
أنا ممكن أتغير بجد، بس ارجعي له.
فات الأوان.. أنا خلاص مابقتش أحبه.
إزاي؟ بالبساطة دي؟
الحب مات يوم ما اتأكدت إنه مش سندي، وإنه عمره ما هيقف في وشك عشان خاطري.
داليا شربت آخر بؤ في القهوة وقامت
تعرفي يا طنط؟ أنا بشكرك! بجد.. لولا اللي عملتيه مكنتش فوقت وشوفت الحقيقة.. دلوقتي أنا حرة، ومبسوطة.
تهاني قامت وقفت وهي بتترعش
هتندمي! خسرتي راجل ملو هدومه!
لا يا طنط.. داليا ابتسمت وهي ماشية.. إنتي اللي خسرتي.. خسرتي جوزك زمان، ودلوقتي بتخسري ابنك، لإن الأيام هتحسسه إنك إنتي اللي خربتي حياته!
إنتي إزاي...
مع السلامة يا طنط تهاني.. وياريت دي تكون آخر مرة أشوف وشك فيها.
سابت داليا الفلوس على الترابيزة وخرجت للنور، حاسة إن روحها رجعت لها، وإن صفحة النكد اتقفلت للأبد.
النهاية بقلم مني السيد