رواية كاملة بقلم نانسي اشرف
الأيام عدت وأنا غصب عني بتابع اخبارها، اسمها أمل عوض صاحبة هايدي من ايام الكلية .. مهندسة ديكور وماركتنينج مانجر لشركة لسه اسمها جديد في السوق، مش أكتيڤ اوي عالفيس فكان صعب أعرف عنها أي حاجة، نص بوستاتها عن الفن و الرسم و التصاميم و الديكور و النص التاني اهتمامها الكبير بالحيوانات، كنت مستغرب ازاي بتنزل كمية الاستوريز دي عالانستا، كان غريب اوي حوار أنها اكتيف اربعة وعشرين ساعة على ابليكشين في حين انها بتنزل كل سبع شهور بوست عالفيس !
استغربت اكتر من نفسي وتعلقي بيها وبأخبارها، بصوتها في مكالمة بتعملها هايدي جمبنا مثلاً او لما بتيجي سيرتها في الكلام صدفة او حاجة، كنت مستغرب ازاي عيني بتتعلق بالمكان الي اتخانقنا فيه اول مرة انا وهي .. في الباركينج هنا قدام النادي، عربيتها الزرقا الصغيرة و الدريس الأسود الي كانت لبساه يوميها، تفاصيل مخدتش بالي انها علمت معايا كدا غير اما قرب عيد ميلاد هايدي و اتأكدت انها جاية العيد ميلاد
_ هي احم ... هي ...
_ اه جاية
_ هي مين ؟
_ الي انت عايز تسأل عليها و بتستعبط بقالك فترة
كانت جملة شريف الي كانت بيأكل الكلب بتاعه في الجنينة
_ انا مكنتش هسأل على أمل على فكرة
_ وعرفت
اتوترت وحركت خصلاتي لورا _ انا بس كنت عايز اعتذرها عن طريقتي معاها اخر مرة
_ انت هتظيط يا تميم .. انت من امتا و انت بتعتذر يا حبيبي
قعدت مرة تانية و سرحت _ يعني هتيجي على كام كدا ؟
_ مش عارف.. اصلها محضرتش ولا عيد ميلاد لهايدي من اول ما اجوزنا .. كانت بتدرس برا
_ امممم.. تمام .. شغال
قومت و نقيت أجمد اوت فيت عندي و ظبطت شعري ودقني وحطيت العطر بتاعي و استعديت عشان انزل ، ركنت عربيتي تحت بيت شريف وهايدي و فضلت ادور على عربيتها وسط العربيات المركونة ملقتهاش
اتنهدت و فضلت قاعد شوية لحد ما لمحتها بتحاول تركن العربية ومش عارفة
عدلت المراية وفضلت عيني مراقبة الموقف وهي بردو مش عارفة
نزلت من العربية وقربت منها
_ ألاه !
رفعت عنيها ناحيتي وشوفتها، ركنت على الشباك القريب منها و ابتسمت _ سبحان الله .. الواحد مشفش جمال كدا قبل كدا
اتكسفت بس كانت مندهشة ان الكلام دا طالع مني انا
فتحت العربية و مديت ايدي بحركة كلاسيكية كنت بشوفها في افلام الخمسينات
مدت اديها وطلعتها من العربية بهدوء و ركبت العربية و ركنتها بكل سهولة و نزلت
_ على فكرة كنت هعمل كدا
_ اه ما انا
وقربت منها _ اصلي بقالي نص ساعة قاعد براقبك هنا من اول ما وصلتي و قبلهم ساعة ونص وانا مستنيكي توصلي
بصتلي بزهول وعدم تصديق قبل ما اتحرك قدامها _ ناوية تفضلي بفستان سندريلا بتاعك دا في الشارع ؟ .. وبعدين انا سمعت ان المكان بيبقى مش ولا بد يعني بعد واحدة بليل
_ انت تاني ؟
مديتلها دراعي عشان تمسك فيه بردو _ يلا ؟
مسكت دراعي ولفته بدراعها في وضع الأنكچة اللطيف و طلعنا و احتفلنا سوا كلنا، في عيد الميلاد عيني منزلتش من عليها، فضلت مراقبها و مراقب خطواتها و كلامها بشكل مبالغ فيه، حسيت انها كانت وحشاني، وبدأ إحساس تصديق مشاعري الي اتحركت من ناحيتها من اول يوم وانا الي بهرب من الحوار بكلمة مستحيل !
_ يلا يا أمل عشان اوصلك مش هينفع تسوقي في وقت زي دا
_ وعهد الله ما حد هيوصلها هنا غيري
وبصتلها وانا ببتسم _ أصلي بقيت خبير في الحوار دا
شريف بصلنا بعدم فهم _ حوار ايه ؟
رجعت بصتله _ اسكت انت انا عارف الطريق بتاعها كويس
ورجعت ابصلها تاني _ يلا ؟
_ يلا
وصلنا العمارة بتاعتها وفضلنا انا وهي قاعدين لحظة
_ على فكرة انتي نسيتي دي
ورفعت السلسلة بتاعتها والي كانت عبارة عن لفظ الجلالة و آية الكرسي، بصلتي
_ ياااه انت مش متخيل انا عيطت قد ايه اما لقتني ضيعتها
مسكتها _ السلسلة دي بتاعت تيتا .. قالتلي انها بتجيب كل حاجة حلوة معاها
رفعت عنيها ليا _ انت مؤمن بالصدف ؟
_ لأ، بس عارف ان في حاجة اسمها قدر
اتعلقت عنيها بيا بتركيز _ اتنين مكنش ليهم صلة ببعض .. طريقين غير بعض و حصل بينهم خناقة عشان يكتشفوا انهم رايحين لنفس المكان .. القدر غريب مش كدا ؟
_ فعلاً
ورجعت تبص للسلسلة مرة تانية
_ غريب
بصتلي وهي بتمدها ليا _ ممكن تلبسهالي ؟
_ اكيد
شالت شعرها على جمب ومديت ايدي ولبستهالها وابتسمت لنفسها في مراية العربية
_ انا عرفت ان طريقك مش المعادي ... ليه قولتلي يوميها أنها في طريقك
_ مش عارف .. يمكن دا كان ترتيب القدر بردو
شاورت براسها وحسست على السلسلة _ انت عارف ان تيتا زمان ضاع منها السلسلة دي بردو ؟
_ ورجعت ازاي ؟
التفتتلي بكامل وشها
_ جدو ... جدو الي رجعها
_ وبعدين ؟
_ اجوزوا
ابتسمت وانا ابتسمت وبعدنا عنينا عن بعض
_ هشوفك تاني ؟
_ احتمال .. ممكن ... سيبها للقدر
_ يبقى هشوفك تاني
نزلت من العربية وفضلت انا براقبها و بفكر قبل ما اخد القرار، نزلت وراها ووقفت عند
_ أمل
التفتتلي من غير ما تكلم
_ انا عايز أبقي الحاجة الحلوة الي السلسلة جابتها
#نانسي_أشرف
