رواية كاملة بقلم نانسي اشرف
_ قومي، انزلي
_ أفندم ؟
_ انزلي من العربية بقولك انزلي
نزلت من العربية ووقفت قدامي _ انت اجننت ؟ انت ازاي تخبط علي العربية كدا
_ عربية ايه جتكوا نيلة .. اما بتعرفوش تسوقوا بتتنيلوا تجيبوها ليه
_ تصدق انك قليل الأدب ومش محترم
ركبت العربية و مهتمتش بكلامها _ انت بتعمل ايه يا أهطل انت .. انزل من عربيتي
_ انتي هتبعدي عن الطريق و الا وعهد الله هشوطك في طريقي ومهسمي
_ بقولك انزل !!!
رجعت بالعربية لورا و ركنتها بإحترافية ونزلت وانا في ايدي المفاتيح، مسكت اديها وحطيت المفاتيح فيها
_ تاني مرة .. الشارع دا مش بمزاجك .. وان واي .. يعني وقفتك في ام الشارع تعطل أمه محمد قدامك فاهمة ؟
سيبتها ودخلت النادي ومهتمتش لشتايمها الكتيرة الي كانت بتقولها
_ وربنا احنا كنا قايمين نمشي بجد ايه التأخير دا كله
_ معلش كان في واحدة طالعة من كي جي وان كانت بتورينا خبراتها في السواقة
التفت لشريف صاحبه _ جاية الشارع من طريق تاني و قافلة عليا لأ و كمان بتقاوح و مش راضية تركن
_ وانت
_ ركنتلها
_ يا جامد
_ انا مش عارفة أمل اتاخرت كدا ليه
كانت جملة هايدي مرات شريف الي ميلت عليه _ امل مين ؟
_ صاحبتها .. المفروض انها جيبهالك عروسة
_ تاني يا هايدي انتي مبتتعبيش ؟
_ انت عيل موراكش جواز و لا بتاع اقعد بقا خلينا نتصرف بدل ما انت عايش صبارة كدا
_ دي مانجة دي ؟
شربت العصير وانا برجع بعيني لشريف _ وهي حلوة على كدا
_ اهي جات هناك اهي
التفت وانا بقف أسلم عليها معاهم قبل ما عنيها تيجي في عيني
_ الله ! جيت لقضاك يا حبيبي
_ جرا ايه .. انتي ماشية ورايا ولا ايه
= في ايه يا جماعة انتوا تعرفوا بعض
_ الراعي الرسمي لـ الزحمة و العطلة في مصر
_ حرامي ومتحرش ... دا انا هوديك في ستين داهية
= اهدوا يا شباب فرجتوا الناس علينا
_ مين البتاع دا و تعرفيه منين يا هايدي
_ بتاع !!! بتاع مين يا شبر ونص يالي مبتطوليش الدريكسيون
_ اسمالله على مقامك يا سخيف يا مستفز .. وبعدين ايه دا ! في حد يلبس قميص روز في الشتا انت عبيط ؟
_
_ مش ذنبي انكوا جايين كلكوا صدفة في نفس الطريق
_ انتي حولة ؟ دا طريقنا !
_ نوت ماي بروبليم
_ دا انا نفسي أمسك البهيم الي اداكي الرخصة وارنة علقة !!!
= اقعد يا تميم بقا بقينا فرجة النادي
قعدت في الكرسي الي قصادي وهي بصالي بغضب مكتوم
_ ايه هتحطيني في ساندوتش يعني و لا ايه ؟
_ دا ايه دم الصراصير دا
_ يا بنتي قصري لسانك معايا انا عصبي و مبشوفش قدامي
_ طب قوم كدا وريني هتعمل ايه
_ لمي صاحبتك يا هايدي !!
_ متشوف الي انت جايبه معاك دا يا شريف !!!
= على فكرة بقا لو فضلتوا انتوا الاتنين بالحال دا احنا هنمشي ونسيبكوا اقعدوا بقا اردحوا لبعض لصبح يلا يا شريف
_ يلا فين .. خدي البت دي معاكي عشان متركبونيش جناية
_ جناية !!! طب مد ايدك عليا كدا و شوف هعلقك ازاي
_ وربنا محد هيتعلق هنا الا انتي .. امسكها يا شريف ..شر... ايه دا
وقفنا احنا الاتنين بندور عليهم
_ هم مشيوا ؟
_ باينلهم كدا
رجعنا بصينا لبعض تاني
_ اه طبعاً ما هم شايفين بلطجي عمال يجعر زي البهايم
_ ما هو لو انتي بنت طبيعية زي باقي البنات و ظابطة تون صوتك مكناش اتفضحنا
_ والله شوف نبرتك عاملة ازاي و قيس عليها
_ مستفزة
_ سخيف
طلعنا احنا الاتنين الباركينج
_ عربيتي فين !
التفتلها في نفس اللحظة الي لقيتها بتبصلي فيها بزهول
_ عربيتي مش موجودة
_ اتسرقت ؟
الفون بتاعها رن _ ايوه يا هايدي ... ايه ؟ ... ليه ؟. ... وخدتي المفاتيح ازاي ؟ ... متقوليش كنت سرحانة وانا بتخانق .. هو اصلا الي غلطان .. طب انا هروح ازاي دلوقت .. مستحيل طبعاً ... خلاص خلاص .. سلام
بصتلي وانا ساند ومبتسم بإنتصار
_ انسى انا مستحيل اطلبها منك
_ ماشي
ركبت العربية وشغلتها و فتحت فاتحة السقف ورجعت أبصلها
_ بس على فكرة المكان هنا مش أحسن حاجة بعد واحدة بليل
وغمزتلها عشان تفهم، اتوترت وانا خدت بالي و طنشت .. اتحركت بالعربية خطوة قبل ما الاقيها بتنادي _
_ هه بتقولي حاجة ؟
_ المعادي في طريقك ؟
ابتسمت وانا بفتحلها الباب _ في طريقي
