اسكريبت جديد من حواديت راكان وإيميليا مكتملة بقلم الكاتبه مارينا عبود ج 2

أوي الإتنين بيخافوا على بعض ومتعلقين ببعض بشكل غريب سيف بيخاف عليها من الهواء الطاير بيهتم بيها وكأنها بنته مش أخته صحيح بيحصل أوقات بينهم خناقات بس الحلو أنها مش بتطول وخصامهم مبيكملش ساعات بس شكلها خناقتهم المرادي غير كل مرة.
راكان ممكن تتكلم معاه بهدوء من فضلك.
وأنا من أمتى بقسى عليهم يا إيميليا
بصيت له بزعل فمسك إيدي وقال بحنان
متقلقيش هيتصالحوا زي كل مرة أنا عارف سيف هو مستحيل يزعقلها غير لو في سبب قوي خلاه يتعصب.
كنت هتكلم ولكن وقفت لما لقيت باب الشقة اتفتح بصيت ناحيته لقيته داخل مضايق والزعل واضح على ملامحه بصيت لراكان فطمني بنظراته وقال بصوت عالي وحازم
سيف تعال هنا عاوز اتكلم معاك شوية.
حاضر يا بابا.
سند موبايله ومفاتيحه على الترابيزة وقعد قدامنا 
خير يا بابا عاوز تتكلم معايا في إيه
اتنهد راكان وقال بهدوء 
إيميليا لو سمحت اعملينا أي حاجة نشربها.
حاضر.
كنت عارفة أن راكان عاوز يتكلم معاه على انفراد مش هدفه اعمله حاجة يشربها دخلت وقفت في المطبخ وفضلت بتابعهم من بعيد.
قولي إيه إللي حصل بينك وبين سيليا
مفيش يا بابا مشكلة بسيطة وهنحلها سوا.
لا أنا عاوز أعرف هي عملت إيه يخليك ترجعها من جامعتها معيطة! دا أنت عمرك ما زعلتها ولا حتى بتستحمل حد يزعلها.
اتعصب وقال بضيق
كله بسبب البنت الزفته إللي كانت واقفة معاها بابا البنت دي مش تمام وأنا حذرت سيليا أكتر من مرة متمشيش معاها ولا يكون ليها كلام مع البنت دي بس النهاردة هي خالفت كلامي وروحت لقيتها واقفة معاها.
طيب وهل دا مبرر يخليك تزعقلها قدام كل صحابها وتحطها في موقف محرج قدامهم وكمان ترجعها من الجامعة معيطة!
حط رأسه في الأرض وقال بندم
أنا معترف إني غلطت لما زعقت فيها قدام صحابها وأني كان المفروض اتكلم معاها بيني وبينها ونتعاتب بس أنا مقدرتش اسيطر على غضبي وقتها بابا أنا مش هستحمل حد يجيب سيرة أختي بسبب بنت زي دي.
بص يابني أنا عارف أنك عاوز مصلحتها وخايف عليها بس مهما حصل إياك في يوم تهين أختك قدام حد ولو حبيت تعاتبها يكون بينك وبينها وتفهمها الصح من الغلط بهدوء وبدون زعيق ولا عصبية الستات مبتجيش غير بالحنية فإياك في يوم قلبك يقسى عليها أو تصرفاتك تتغير معاها وحتى مراتك في المستقبل لازم تعاملها بنفس الطريقة ومتزعلهاش وعاوزك تعرف إن سيليا مش بس أختك هي بنتك الصغيرة وأظن أني مش محتاج أعرفك تتعامل معاها إزاي المهم عندي أن مهما حصل بينكم إياك تسيبها زعلانه منك ويلا نادي عليها وصالحها دلوقت قدامي.
ابتسم وقال بحب 
حاضر وعلى فكرة كنت هصالحها من غير ما تقولي أصلا ميهونش عليا زعلها.
مبسوطة بجد لأني عرفت أختار أب لولادي زي راكان هو زوج جميل أب جميل حنين بيعرف يحل اي مشكلة في حياتنا مهما كانت كانت صعبة بكل هدوء وحكمة وعرف يطلع ابنه زيه وحقيقي يابخت إللي سيف ابني هيكون من نصيبها يابختها بقلبه ويابختي أنا بقلب راكان ووجوده.
بابا حضرتك ناديت عليا.
آه يا حبيبتي سيف عاوز يتكلم معاك.
بصتله بزعل فبصلها بحنان وقام باس رأسها وقال بنبرة حنينة
حقك على قلبي أنا اسف إني زعقتلك النهاردة واحرجتك قدام صحابك بس خايف عليك وعلى مصلحتك متزعليش مني.
بصتله بزعل لثواني أخدت نفس عميق وملامحها اتحولت للسعادة ورجعت ابتسمت وقالت بمشاكسة
خلاص مش زعلانة بس لازم تجيبلي حاجة حلوة علشان اقبل اعتذارك.
مصلحجيه.
ما أنا مش هقبل اعتذارك كده عادي يا بيه.
لا ولله طيب تعاليلي بقى علشان حسابنا لسه مخلصش.
يا ماما.
جريت على اوضتها فجري وراها وهو بيضحك زي ما كانوا أطفال قربت قعدت جنب راكان وقلت بحب
أنا فخورة بيك أنت أفضل أب في العالم.
أنا بقيت كده بفضلك.
بص يا ولااا أختك بقت أجمل عروسة إزاي.
أنت فعلا بقيت أجمل وأحلى عروسة في الدنيا.
لحظة بس.. سيف أنت بتعيط 
وأنا هعيط ليه يا مجنونة أنت! دا شكلها في حاجة دخلت في عيني بس وهروح اغسلها.
لا ولله طيب وريني عيونك كده.
بت ابعدي عني وارجعي ظبطي فستانك.
عيونها دمعت وقربت منه 
يخرابي دا أنت بتعيط بجد!! يا سيف بصلي. 
أنت كبرتي أمتى يا سيلي دا أنا لسه كنت بعملك ضفيرة من كام سنة
عيطت وقالت بزعل 
سيف ولله اروح أقول ليوسف يلغي الفرح خالص أنا أصلا مش عاوزه اسيبك.
مسح دموعه وضحك
جوازة إيه إللي تلغيها يا مجنونة دا ما صدقت اخلص منك وبعدين مش دا يوسف إللي صدعتي أهلي بيه وخلاص هيخطفك مني ابن الجزمة.
أنت مش هتعرف تخلص مني أبدا أنا بحبك أوي بجد.
وقال بحنان
وأنا كمان بحبك أوي أوي ولو الواد يوسف فكر بس يزعلك تعالي قوليلي وأنا هكسرلك دماغه.
كنت واقفة بتابع حوارهم وأنا بعيط ومشاعر كتير جوايا من فرحة لفخر بيهم لزعلي انهم كبروا قدامي بسرعة وكأني ملحقتش اشبع منهم طول عمري بحب علاقتهم حنانهم على بعض وخوفهم وتعلقهم ببعض.
بالله العيون الحلوة دي ينفع تعيط يوم فرح بنتها
هما العيال دول كبروا أمتى يا راكان 
ابتسم وقال بحنان
العمر جري بسرعة أوي بس المهم أننا عرفنا نربيهم صح نجحنا أنا وأنت نكون أب وأم كويسين ليهم نجحنا إننا نقوي علاقتهم ببعض والنتيجة اهو قدامنا وأتمنى يفضلوا العمر كله سند لبعض وسند لينا.
بصولنا بحب فقال راكان بمرح  
عاجبكم كده خليتوا حبيبتي تعيط بسبب نكد حضراتكم!
ضحكوا وقربوا بحنان.
هنا عائلتي هنا الحب والأمان 
ظللت أنتظر سنوات 
حتى وجدتك 
فصار حبك كالموسيقى التي تملأ قلبي.
الحدوتة اتكتبت بكل حب وحنان العالم ولله وأتمنى تحبوها وتلمس قلوبكم ودي مش مجرد حدوتة دا حلمي وعيلتي إللي بتمنى اعملها في المستقبل
متنسوش تشاركوني رأيكم لأنه بيفرق معايا أوي وتعملوا شيرر كتير للحدوتة لأني بتمنى تاخد حقها بجد
مارينا عبود
حواديت_ راكان_ وإيميليا