رواية ليلي وحمزة مكتملة لجميع فصول بقلم الكاتبة ميار
-مفيش خروج يعني مفيش خروج!
-ليلى أنتِ تعبانة في دماغك؟ أنتِ مفكرة إنك لما تقفي قدام الباب كدة مش هعرف أتحرك يعني؟ أنا لو زقيتك هتطيري
بصيتله بغضب وأنا بلاحظ فرق الحجم ما بينا ،مش فرق الطول لأ فرق الحجم! ،ربعت إيدي وقولت :
-برده يا حمزة مش هتطلع
-يا عيون حمزة هي ساعة واحدة بس
-كداب وبتقعد ساعتين ونص وبتوصل ل تلت ساعات كمان
-المرة دي ساعة بجد
-برده بتكدب
-أيوة يعني أنتِ عايزة إيه دلوقتي؟ أنا عايز أنزل
-مفيش نزول!
مسح وشه بعصبية وقال :
-يارب أنا أهو هادي للآخر ،وسعي يا ليلى نتجريش شكلي على المسا بقى
-مهو مش كل يوم هتنزل إنت وصُحابك وتسبني قاعدة هنا لوحدي زهقانة
-إطلعي فوق عند أمي
-منا هطلع أقعد بين أربع حيطان برده! أنا عايزة أقعد معاك إنت
-طيب ساعة وهاجي نقعد مع بعض
-لأ مفيش ساعات دلوقتي هتقعد معايا يا إلا تخرجني
-هخرجك الساعة 10 بليل؟ ونروح فين إن شاء الله نقعد على القهوة
-وليه لأ؟
-آه وأشربك شيشة كمان
-ياريت
-أنتِ لو موسعتيش من قُدامي دلوقتي ههبد دماغك دي في الباب إللي وراكي دة
-خلاص يبقى سبني أنزل لوحدي ومتقعدش تقولي لأ بخاف عليكي والعبط دة
-ليلى أنتِ نازلة لغاية دلوقتي تلت مرات ،مرة توهتي فيها ،مرة تيليفونك إتسرق ،مرة فلوسك إتسرقت كلها
-إنتم إللي الحتة بتاعتكم مش كويسة
-وافقتي تتجوزي فيها بمزاجك بعدين أنتِ عارفة إني خلاص بدور على شقة جديدة في مكان أحسن
-برده دة
بصلي وإستهزاء وقال :
-طيب عديني وعدي ليلتك
-لأ وإتكلم بإسلوب أحسن من كدة
-على فكرة أنا ممكن أشيلك دلوقتي كدة أحطك في نص الصالة وأخرج أنا عادي
-مفيش خروج يا حمزة يعني مفيش خروج وهتقعد معايا يعني هتقعد معايا
قرب مني فبعدت لا إراديًا ودة مش خوف يا جماعة أنا بس مبحبش أقف عند الباب هوا جامد ،بصلي بإستهزاء تاني؟ لا دة نسى بقى أنا أبقى مين
-مين؟
-مين إيه؟
-أنتِ تبقي مين؟
-هو أنت كنت سامعني؟
-أه بطلي تفكري بصوت عالي
كان بيلبس الكوتشي فدخلت المطبخ وطلعت بمعلقتين في إيدي فبصلي وقال :
-ليلى والله هزعلك
قعدت أخبط بالمعلقتين في بعض وهو بيكره الصوت دة جدًا فزعق وقال :
-بس يا ليلى دة مش هزار
-بعزف
-وأنا هعزف برده بس على دماغك دي
قرب جامد وأنا بعدت وسكت ومسك باب الشقة وهبده وراه ..
....
-هو فين الغدا؟
-معملتش
-والله ودة اسمع إيه؟
-اسمه تعبانة
-وماله يا حبيبتي بس التعبانة دي بتروح للدكتور مش بتقعد تتفرج قدام التيليفزيون على أفلام عبيطة شبهها
-شتمتني وأخدت حسناتك
-أنا عايز أطفح دلوقتي يا ليلى
-أطفح عواقب أفعالك
قام وزعق :
-ماشي يا ليلى ،أنا طالع عند أمي لا تقولي أفعالي ولا تقولي مفيش أكل
-ياريت تقولها تنزلي أكل أنا كمان
بصلي بقرف وطلع وأنا كملت أفلامي عادي جدًا
الساعة تسعة بليل ولسة منزلش أيوة هو وحشني ليه دلوقتي؟ بعدين هو فاكر إنه
....
-تعالي شوفي ابنك عمل فيا إيه يا نبيلة
ضحكت وهي بتقولي :
-تعالي يا ليلى كنت عارفة إنك طالعة
-ليه فكراني مهزقة هطلع أصالحه؟
-أيوة أنتِ فعلًا كدة
قالتها رزان أخته فقولتلها بكل كبرياء :
-محصلش أنا مش طالعة أصالح حد أنا طالعة أشتكيه لأمه
-ليه عيل صغير أنا؟
كان صوته وهو واقف عند الباب ،شعره منكوش وصوته غالب عليه النوم وشكله لسة صاحي بس حلو برده! طنط نبيلة بصتله وقالت :
-بس ملكش دعوة ،إشتكي يا ليلى يا حبيبتي
-يرضيكي يسيبني كل يوم كدة بليل ويخرج ويتسرمح مع أصحابه على القهوة؟ وشوفي بقى بيقعد كل دة ليه تلاقيه بيشرب شيشة
-بتشرب شيشة يا ولا؟!
-أيوة شيشة تفاح
-وكمان عارف أنواعها يرضيكي كدة يا نبيلة؟ دة كان أخدني من بيت أهلي وردة مفتحة زي الفل خلاني صبارة بتشوك!
-أنتِ بتشوكي من يوم ما عرفتك
بصتلها وقولت بغضب :
-شايفة؟ شايفة ردوده المُستفزة
جه وقعد جنبي وهو بيقول لمامته :
-طب يرضيكي متعمليش أكل وتسيبني جعان؟
-لأ ميرضنيش
-طب يرضيكي يعني يا نبيلة يسيبني لوحدي كل يوم ويروح لصحابه!
-لأ ميرضنيش
-أنا عارفة إني خلاص مبقاش يحبني
هو أزاي أنا بتكلم كدة ومش واخدة بالي إنه جنبي؟ ليه محدش حذرني؟ بصيتله لقيته بيجز على أسنانه وهو بيبصلي فقولتلها :
-بصي! بصي بيجز على أسنانه أزاي نفسه يضربني؟
حط
-أنا أضربك يا حبيبتي؟ ليه مجنون؟ مجاش اليوم إللي حد يمد إيده على ليلِي
طبعًا دة يبان كلام رومانسي جدًا بس محدش دلوقتي حاسس بكتفي إللي بيضغط عليه بدراعه! ،قومني وقال :
-أنا هسيبك تريحي شوية يا أمي وهاخد ليلى أفسحها زي ما هي عايزة
طلعنا برة فقولتله :
-هتعمل إيه؟
-هفسحك ،حرفيًا هفسحك
أخدت السلم من فوق لتحت جري ودخلت البيت وقبل ما أقفل حط رجله ودخل وهو بيقول :
-طالعة تشتكيني؟
-محصلش دة أنا كنت بمدح فيك
-أنا بشرب شيشة ها!
-دة أنت مبتحطش السجارة في بوقك يا حبيبي
-وبسيبك كل يوم لوحدك! دة أنا بنزل يومين في الإسبوع بالعافية يا جاحدة!
-تنزل وتتبسط طبعًا مين دة إللي بيمنعك بس؟
-أمي إللي بتمنعني أمي
-إخس عليها طنط نبيلة
قرب مني ومسكني من لبسي وقال بقرف :
-إدخلي إلبسي خلصي
-هترميني في الشارع صح؟
-أيوة بالظبط كدة
-حرام عليك يا حمزة حرام دة أنا مراتك حبيبتك إللي ملكش غيرها
-تنزلي ولا نجيب حاجات حلوة وأكل ونسهر
-نسهر طبعًا
-طيب جهزي الفشار عُقبال ما أطلب أكل وأنزل أجيب حاجة حلوة
....
-حمزة أنت عارف إني بهزر صح؟
قولتها وأنا قاعدة جنبه باكل بيتزا فضحك وقال وهو بيحطلي صوص :
-عارف يا عيون حمزة
-وإني بحبك جدًا ومليش غيرك وكنت بهزر معاك
-يعني هتسيبيني أنزل براحتي
إتعدلت في قعدتي فقام رجعني تاني وقال وهو بيضحك :
-خلاص متقعديش كدة ،مش هنزل بعدين غير
-هو أنا بخوف يا حمزة؟
-لأ طبعًا محصلش
-طيب طمنتني
ضحك وقعدنا نتفرج على الفيلم سوا
وهو الحُب إيه غير حمزة؟
......
تمت
