قصة واقعية بقلم ريديت

هو أنا غلطانة إني خدت ابني اللي لسه مولود ورحت بيت أمي عشان جوزي وأمه ما سابوليش ولا لقمة
أنا ولدت من خمس أسابيع. من ساعتها وحماتي قاعدة في الصالون بتعزم ناس وبتقلب الدنيا في البيت وفي كل حاجة. ما اتكلمتش خالص عشان لو فتحت بقي جوزي هيبدأ يزعقلي ويقولي إن أمه جاية تساعدني ولازم أكون ممتنة ليها. ف أنا عملت إيه طنشتها وخدت بالي من ابني.
أنا اللي برضع وبغير وبنضف وبمسح. بنام كام ساعة على بعض بالعافية. يعني بصراحة حماتي مش بتساعدني في أي حاجة تخص البيبي. بس قلت لنفسي ماشي على الأقل هي بتطبخ لينا.
امبارح بالليل كنت جوه الأوضة برضع ابني. عارفة إني كنت اتأخرت على العشا بس كنت متأكدة إن جوزي وأمه سابولي طبق. أول ما ابني خلص رضاعة خرجت من الأوضة لقيتهم قاعدين بيتفرجوا على التلفزيون. سألت على العشا بتاعي جوزي قالي يمكن يكون على البوتاجاز. بس وأنا رايحة على المطبخ أمه قالت بصوت عالي إنها ما سابتليش أكل! اتصدمت سألتها ليه ردت بكل برود ما شفتكيش على السفرة فافتكرت إنك مش جعانة.
أنا خرجت عن شعوري وصرخت

فيها وقلت لها إني كنت برضع ابني وطبعا كنت جعانة أنا كنت بمىوت من الجوع! طنشتني وقالت إن ده مش ذنبها إني ما حضرتش وقت العشا. مع إن كانت عارفة كويس قوي إني جوه مع ابني برضعه وما دخلش بقي أي حاجة من ساعات!
جوزي طلب مني ما أزعقش في أمه بس قلتله إنت شوفت اللي حصل وما فكرتش حتى تسألني إذا كنت جعانة. انفىجر فيا وقالي إنتي عايزاني أعملك إيه قولتله مش عارفة يمكن مثلا كنت عيزاكم تسيبولي شوية أكل
دافع عنها واتهمني إني أنانية عشان زعلت وهو يا عيني تعبان من شغله المتعب في القسم.
اتخانقنا ودخلت أوضة النوم لميت شنطة صغيرة ليا ولابني وكلمت أخويا ييجي ياخدني على بيت أمي.
جوزي اتجىنن مني وأنا خارجة اتخىانقنا على الباب وقالي إني بتصرف تصرفات ملهاش مبرر وطفولية.
قولتله إني مش قادرة أتحمل وجود أمه في البيت تاني رد وقالي إني لازم اتكسف من نفسي عشان بتكلم عنها كده وهي وقفت حياتها عشان تساعدني.
أخويا كان وصل فركبت العربية ومشيت.
في الطريق جابلي أكل أكلت كإني ما كنتش دوقت أكل من شهور. بس جوزي ما وقفش رسايل واتصالات. آخر رسالة كتبلي إني مجىنونة ولازم أرجع النهاردة.
رديت عليه وقلتله إن أمي وحشتني ومبسوطة قوي في بيتها النضيف وبأكلها الصحي وعايزة أقعد شوية هنا.
اتعصب أكتر وبعت رسايل لأهله وقالهم إني باخد ابنه منه وبعاقبه بسبب الأكل!
تعديل
للناس اللي بتقول إني بحرمه من ابنه والله عنده كامل الحق يشوفه. هو اللي مش بييجي لأنه بيكره أمي ومش طايق يقعد معاها في نفس الأوضة.
هقعد هنا قد إيه مش عارفة بس على الأقل هنا بتعامل معاملة الأميرة أمي وأبويا وإخواتي مدلعيني ودي حاجة عمري ما حسيتها مع جوزي!
وجوزي لو فعلا عايز يشوف ابنه ييجي هنا عند أمي بس أنا شاكه إنه هيعمل كده لأنه شايف نفسه وأمه مش غلطانيت ومش هيقبل يتنازل حتى ويجي.
فيه ناس كتير سألوني على حاجة فأحب أوضح آه لما قلت شغله المتعب في القسم أقصد قسم الشرطة هو ظابط. آسفة لو موضحتش النقطه دي قبل كده كنت فاكرة إن قصدي هيكون واضح.
تعديل
حسيت بالشفقة عليه فبعتله شوية صور لابني وهو نايم.
رد بإيه رسالة طويلة عريضة كلها لوم وبيحاول يحسسني بالذنب وبيقول إني بعمل كده عشان أغيظه لأن هو مش قادر يشوف ابنه!
كمان شتمني بكلمة عمره ما قالها قبل كده أنا متضايقة ومهزوزة جدا كنت فاكرة إني بعمل حاجة لطيفة وإنسانية لما بعتله الصور بعد ما قلبي رق شوية عليه.
قررت إني بكرة هروح أجيب باقي حاجتي لأني محتاجة وقت ومكان أفكر في كل اللي قاله وعمله.
حاسة بوجع جوايا بس على الأقل اتعشيت النهاردة مش زي ما حصل من ساعة ما أمه دخلت بيتنا ماكلتش لقمة عدله!
تعديل
جماعة بجد مش هتصدقوا عمل ايه دلوقتي!
بعتلي صورة ليه هو وأمه وهما بيطبخوا في المطبخ الساعة كانت قربت ل٧ بالليل وبيقولي إنه بيرد الجميل على الصور
اللي أنا بعتها وإنهم بيعملوا العشا ومش هيعملوا حسابي بجد المرة دي
أنا... أنا بجد هموت من الضحك ! بجد إيه ده أنا مش قادرة أنطق!
ما رديتش عليه لحد دلوقتي ومش ناوية أرد لأني متضايقة جدا وممكن أقول كلام أندم عليه.
هقفل التليفون أو أحطه على الصامت عشان مش عايزاهم يبوظولي الليلة دي كمان وأنا بصراحة رايقة وهو هيحاول ينكد عليا.
بكرة هلم حاجات أكتر ليا أنا وابني عشان أقدر أقعد فترة أطول في بيت أمي.
تصبحوا على خير!