اسكريبت بقلم هند حارس
أردت فقط الابتعاد عن الحرام لا الابتعاد عنك
وأنا بقلب على الفيس شفت البوست ده كنت هعمل سكيب وأكمل عادي لحد ما ركزت في الاسم
عارفاه كان في يوم أقرب ما ليا كان في يوم مش غريب عليا كان حد من الأصدقاء عندي مشيره
كان عاملي بلوك ليه يظهر لي دلوقتي ليه يظهر وأنا مخطوبة لحد تاني
خدني فضولي ودخلت الصفحة بتاعته لقيته شال البلوك معرفش إمتى بقالي كتير مدخلتش صفحته تحديدا من وقت ما اتخطبت وبطلت أسأل نفسي سؤال ليه ليه في يوم وليلة لقيته اتغير مبيردش مبيسألش في يوم وليلة لقيت معمول ليا بلوك
من حقي أزعل من حقي أعيط لا مش من حقي لأن ده ذنبي مش هبقى عارفة إني كنت بعمل حاجة غلط وكمان بجاحة!
أحسبن عليه أدعي إنه ظلمني بأي حق هبقى زي واحد بيدعي إن ربنا يوفقه في الأغنية اللي رايح يغنيها! بيدعي ربنا يوفقه لذنب
الله يعلم إني كنت بجاهد نفسي وكل مرة كنت بقول هقوله نبعد عشان حرام بس نفسي كانت أمارة بالسوء
الله يعلم إني برغم ذنبي فكنت كل يوم أنام وأنا ببكي لأني جعلت الله أهون الناظرين ليا
الله يعلم برغم ذنبي فعمري ما اتخطيت حدوي في الكلام
عارفة مش مبرر بس محاولاتي كانت على قد طاقتي
لما دخلت صفحته
لفت انتباهي كومنت
يا عم أنت عمال توجع قلبنا معاك وهي اتخطبت وتلاقيها اتجوزت كمان
انصدمت هو قصده مين قصده أنا
خرجت من البوست عشان أشوف أكتر من بوست من أول بوستات الدعاء أن يجمعه الله بمن يحب في عفو وعافية لبوست
أنا العبد الذي لا ينكر ذنبه في حقك يا الله ولكني تبت أنا الذي أثقلني ذنبي فلا تحرمني من أحببت لا تحرمني خير ما عندك بسوء ما فعلت
فضلت أقرأ لحد ما عيني دمعت غصب عني
طب ليه ليه مبررش وقتها
كنت أكتر حد هيدعمه كنت أنا اللي هبعد
ليه البوست ظهر لي بعد ما اتخطبت لإنسان ميستاهلش من قلبي الخيانة
خرجت من الأكونت واستغفرت ربنا
كان في يوم في حياتي بس دلوقتي في حد تاني في حياتي دخل بابنا من بيته وطلبني في الحلال
ميستاهلش إني أخونه حتى بقلبي أو بعقلي
هو كان فترة في حياتي وخلصت
ندم بعد فوات الأوان عمره ما هيصعب عليا
في يوم كنت مستعدة أحارب عشانه هو مش أنا كنت قافلة على الموضوع
ليه عيني دلوقتي بتدمع هو خسرني وحتى مبررش وقتها
بعد فترة حصلت مشكلة وتم الانفصال بيني وبين خطيبي بسبب مشاكل في القايمة ووالدته
خدت فترة أحاول أتعافى
اتعلمت حاجات جديدة بدأت الشغل اللي بحبه قللت قايمة معارفي واكتفيت بالناس اللي بحبهم
وفي يوم لاقيت بابا بيقول في حد متقدملك
ما اعترضتش وافقت أقابله وجهزت نفسي
بالليل كان مفروض أطلع أقابل العريس الجديد لبست وخرجت
ما رفعتش عيني حاسة بتوتر أكتر من أول مرة
مكنتش عارفة أتكلم أو أسأل اللي كنت مجهزاه
بعد أهلي ما خرجوا لقيته بيسأل بلوم وكأنه يعرفني
كان سهل عليكي بعدي للدرجة دي لو كنت اتأخرت شوية كنت هلاقيكي متجوزة!
انصدمت من الصوت
لقيته هو بملامحه اللي في يوم كانت أقرب ما ليا ملامحه اللي عمري ما ركزت في حد زي ما ركزت فيها
بيلومني
لقيت صوتي بيخرج حاد غصب عني
نعم! كان مفروض أستنى لحد إمتى شخص لقيته في يوم وليلة عمل لي بلوك وبعد بدون مبرر ما فسرش سبب بعده
مفروض أبكي على الأطلال وعلى ذنب كنت بعمله بعلمي وأضيع حياتي
ولا مفروض أفضل أفكر في شخص وأنا مخطوبة لحد تاني بعد ما اتقدملي ودخل البيت من بابه وطلبني بالحلال
تقدر تقول لي لو كنت اتخطبت لحد تاني كان هيحصل
كنت هتجوزه وأسس عيلة مبنية على الحب وإنت هتفضل ندمان العمر كله
خلصت كلامي اللي خرج غصب عني بنبرة حادة
مخنوقة آه منه ومني
مني لأنه برغم اللي عمله لقيت قلبي أول ما شافه دق تاني ما نسيش
ومنه لأنه بيلومني!
اتكلم باعتذار
آسف يمكن غلطت بس كنت عايزك تكرهيني
الذنب كان أكبر من إني أتحمله
كنت شايف مجاهدتك لنفسك في الذنب ده مكنتش هتحمل إني أذيكي
لو قلت لك ممكن ما كناش استحملنا البعد ده
حتى لو ده كان جرح ليكي أهون من عذاب ربنا لينا على ذنب مش بإيدينا
عنده حق بس أنا مكنتش هعرف
ومكنش ينفع يكون في قلبي وأنا مخطوبة لحد تاني
اتكلمت بلوم ونبرة أهدى
ولو كنت خسرتني
اتكلم بابتسامة وباسترخاء وكأنه متأكد من كلامه
استودعتك عند الله والله لا تضيع عنده الودائع
ابتسمت
كنت فاكرة إنه خلاص موضوعنا انتهى
كنت فاكرة هفضل أتعاقب بذنب حبه العمر كله
بس الله غفور رحيم
لما شاف مني توبة صادقة أبهرني بعظمة التدبير
ولما أسلم فديناه
لما تبت عن الذنب ما فكرتش
أسلمت أمري لله والله رزقني فوق ما تمنيت
ما عند الله لا يأتي إلا بطاعته وبتوبة صادقة
هندحارس
رأيكم
متنسوش تسيبوا كومنت عشان يوصل لغيركم
